Голын хөвөө, усны голдрил шиг амьдрал минь хөвөрсөөр - Шинэ бичлэгүүд

Хүүхнүүдийн нүдэнд гуниг байдаггүй

Mon, 07 Jul 2008 10:54:40 +0800

Зөрж өнгөрөх хүүхнүүдийн нүднээс
Зөндөөн олон шүлэг уншиж чаддаг би
Харцнаас нь, нүднээс нь
Хайр гунигийн аялгууг сонсож чаддаг аа, би
Хайртай хүндээ яарсан бүсгүйн нүд
            Хав халуун, тунарсан их гэрэлтэй байдаг
            Жаргалдаа халууцсан тэдний харцанд
            Жавар уярч, цас ханзрах шиг санагддаг аа
Далдуур нэгнийг мөрөөдөн шаналах бүсгүйн нүд
Дарсгүй жүнз мэт халуун гунигтай байдаг юм
Далд хайрын шидэнд нь саран уйлж хоном
Дан утастай хөгжим эгшгээр цангах шиг санагддаг аа
            Хартай нөхрийнхөө атганд хавчуулагдсан бүсгүйн нүд
            Хайлган намрын шувуудгүй нуур шиг байдаг
            Далд гунигийн уйтай цагаан салхинаас
            Давс мэт гашуун эгшиг цалгидаг
Зөрж өнгөрөх зөөлхөн харцнаас
Гоёхон эрвээхэй нислээ ч даль нь бэртсэн байдаг
Дүүрэн жаргалтай монгол омголон харцнаас
Дүрсгүй хараацай дураар халин дүүлдэг
Зөрж өнгөрөх хүүхнүүдийн нүднээс
Зөндөөн олон шүлэг уншиж чаддагаа би
            Хадамдаа гомдсон, хайртдаа хаягдсан
            Харцуулын үгэнд зүрх нь шархалсан
            Харьд суугаа ижийгээ санасан
            Хаа холын нутгаа мөрөөдсөн
            Гуниг баярын халуун хүйтэн аялгууг
            Гудамжинд зөрөх хүүхнүүдийн нүднээс сонсож чаддаг аа би.

Хайртай шүү дээ, чи надад, би мэднээ

Mon, 07 Jul 2008 10:47:46 +0800

Хайртай шүү дээ, чи надад, би мэднээ

Харц, үгийг минь хүлээдэг л биз дээ, би ойлгоно

Шөнөөр унталгүй намайг л мөрөөддөг биз дээ

Шимтэн унтахдаа ч намайг л зүүдэлдэг биз дээ

Олны дундаас харуулддаг л биз дээ, чи намайг

Олж үзэхээрээ нисэхийг шахдаг биз дээ

Олдошгүй эрдэнэ мэт харамладаг л биз дээ, чи намайг

Орхигдож хоцорсондоо чи үргэлж шаналдаг л биз дээ

Ассан хайраа шаналлаар бүрээд хэрэггүй дээ

Азгүй хайр байсан ч хоёулаа дурсаж явъя даа

Авъяас төгөлдөр ухаалаг залуу чамд минь

Аальхан нэг нь дурлаж ч яваа юм билүү

Richard Clayderman - Yesterday

Thu, 03 Jul 2008 12:40:42 +0800

Итгэлт хамбын тайлагдашгүйн нууц

Thu, 03 Jul 2008 12:33:24 +0800

Манай улсаас 30 гаруй хүн Улаан-Үүдийн Иволгын дацанд Итгэлт хамбад мөргөөд иржээ. Тэнд Итгэлт хамба Дашдоржийн цогцсыг ил гаргаад тавьчихсан байсан гэнэ.

Энэ хүн амьддаа эрдэм мэдлэг төгс гэгээрсэн, алдартай хамба байсан юм. Нэг удаа түүнийг эзгүйд цэргүүд дацанд нь дайран орж, архи дарс уун ихэд танхайрчээ. Цагааннуурт явсан Итгэлт хамба үүнийг сонсоод даруй дацан руугаа яарсан аж. Нутагтаа очих замд Галуут хэмээх том нуур байдаг учир түүнийг тойрч их хугацаа алдах байжээ. Гэтэл [...]

♥ ♥ ♥ ♥ ♥ ♥ ♥ ♥ ♥ 09

Mon, 02 Jun 2008 20:00:38 +0800

Хунгийн сүрэг нуурын толионд буух шиг

Хүсэн хүлээсэн мөч миний мэдэлд ирлээ

Мянган жил өнгөрөвч шинэхэн байх үгийг

Магад одоо л хэлье... Би чамд хайртай!

Сэгс цагаан богд

Sat, 31 May 2008 19:57:43 +0800

Нийслэл хотын
Нөмгөн хархүү та
Сайн байна уу?
Хөдөө буйдын
Хүрэн бүсгүй би
Сайн байна.
Намар та манай нутагт
Намын сурталчилгаагаар ирэхдээ
Сэгс цагаан богдод
Сэрүүцэж, халууцаж хонохдоо
Мөнхийн сайхан байлгах
Мөрийн хөтөлбөр танилцуулахдаа
Ардчилал ил тодтойгоо
Алив сайхныг аваад явчихав уу
Хуучин бүхнийг хална гээд
Хуй салхи үлдээчихэв үү
Ганган лоозонгоо
Ган зудаар сольчихов уу
Илтгэл тавихдаа гарамгай
Иллэг хийхдээ сурамгай
Нам томилсон түшмэл
Нас тогтсон таныг
Говийн тэмээчин бүсгүй би
Горьдон харуулдсаар удлаа [...]

Арабын бизнесмен

Thu, 29 May 2008 19:55:48 +0800

Итгэлцэл – арабын ертөнцийн хувьд их чухал зүйл юм. Арабын ертөнц аугаа бөгөөд энэхүү ертөнц нь үндэстнүүдийнхээ хувьд нэг цул биш гэдэг нь ойлгомжтой. Арабын улс орнууд дотроо өвөрмөц нарийн онцлог бүхий харилцааны дэг жаягтай, тэдгээр нь тухайн улсынхаа хөгжил, нийгмийн байдлаас шалтгаалан асар ялгаатай байдаг гэсэн үг юм. Ислам шашинтны ертөнцөд гадаадын хүмүүс арабын зөвхөн эрэгтэйчүүдтэй ажил төрлийн холбоо тогтоодог. Тэд өөр хоорондоо мэндлэхдээ бие биенээ тэвэрч, бие биенийхээ хацарт хацраа хүргэж, нурууг нь зөөлөн алгадаж мэндэлдэг. Бизнес бол тэдний хувьд нэр хүндтэй, чухал ажил гэж үнэлэгддэг. Арабуудтай худалдаа наймаа хийнэ гэдэг нь багахан хэмжээний театрчилсан тоглолт мэт байдаг. Юуны өмнө худалдаа наймааны талаархи төсөөлөл нь европын сэтгэлгээнээс тэс өөр бйдаг гэдгийг мартаж болохгүй. Өрнө ба арабын ертөнцөд ертөнцийг үзэх үзлийн хувьд их зөрүү ойлголтууд байдаг. Жишээ нь: баруунд нийгмийн байгууллага тогтолцоонд итгэдэг. Арабууд бурхнаас заяасан манлайдагчид итгэдэг гэх мэт. Исламын шашны сургааль нь өрнийнхөнд харилцан ойлголцоход хүндрэл байдлыг бий болгодог. Хамгийн чухал нь арабуудад гутамшигтай доромжлолтой санагдах үйлийг хийхгүй байх хэрэгтэй. Тэд хөлөө ширээн дээр тавих зэрэг барууны, ялангуяа америк хэв маягийн биеэ авч явах байдалд дургүй. Арабчууд хэлэлцээр дээр илэн далангүй байдлыг үнэлдэг. Тэдний яриа нь маш их сэтгэл хөдлөлтэй бөгөөд чанга түрэмгий. Тэд нэлээд хүүхэмсэг байж мэдэх ч та тэдний эхнэрүүдийн талаар санаа бүү тавь. Тэд уран илтгэх урлагийг шүтэн бишрэгчид учир та тэдний дэргэд урнаар ярьж чадвал таныг үнэлж та амжилтад хүрнэ. Ялангуяа та наймаалцан үнэ хаяж, барааны үнэ буулгах тал дээр авьяастай бол тэд ийм зүйлд дуртай гэдгийг санаж яв. Арабчууд анх танилцсан цагаасаа эхлэн их эелдэг, найрсаг, янз бүрийн амжилт, эрүүл энх хүссэн үг, ерөөл байнга хэлнэ. Томоохон пүүс, компанийн захирлууд, ажил хэрэгч зарим хүн орчуулагчаар дамжуулан харьцдаг боловч тэд өөрсдөө хэд хэдэн гадаад хэлний мэдлэгтэй, хэд хэдэн томоохон дээд сургууль төгссөн хүмүүс бйдаг. Энэ тэдний элдэв зүйлд төрөлхийн авьяастайг илтгэнэ. Мөн тэдний мөнгөтэй холбоотой. Арабууд маш сайн наймаачид. Гэрээ, хэлэлцээрээр яригдаж шийдвэрлэх асуудлыг урьдаас судлан дүгнэж өөрсдийн байр суурь, болзошгүй алхмуудыг төлөвлөсөн байдгаараа өрнийхнөөс огт дутахгүй. Гэрээ хэлцэл, хүлээн авалт, уулзалтын цагийг маш ухаалгаар зохицуулж, тэдний шашны ёс заншлыг зөрчихгүй байх нь хамгаас чухал гэдгийг үргэлж санаж байх нь зүйтэй. Лалын шашны мөргөлийн цагуудаар уулзалт хийх, эсвэл зоог барихаар тэднийг урихад ирэхгүй юм уу, хоцорвол тэднийг бүү буруушаа. Арабууд архи дарсыг огт амсдаггүй. Энэ нь шашны хатуу ёс журамтай шууд холбоотой. Кофены өмнө хүйтэн ундаа уух эсэхийг асууж байвал уулзалтын хугацаа дуусч байгаа, эсвэл яриа өндөрлөх талдаа орж байна гэж ойлгох хэрэгтэй. Хэрэв та тэдний итгэлийг нэгэнтээ олж, ажил хэргийг амжилттай болгож чадвал танд тэд өгөөмөр хандана. Нөгөө талаар та тэдний итгэлийг нэг л адсан бол ахин олж авахад хэцүү байх болно. Арабууд хэлсэн үгэндээ эзэн болох нь ажил хэрэгч хүний нэр төрийн асуудал гэж үздэг ч олон улсын практикийн дагуу хэлэлцээрийг бичиглэсэн нь танд өлзийтэй байх болов уу.

Хамгийн хамгийн хамгийн ...

Tue, 27 May 2008 19:52:45 +0800

Хамгийн гvн нуур: Хөвсгөл
Хамгийн өндөр хvрхрээ: Хөвсгөл аймгийн Хорьдол Сарьдагт орших 70 орчим метрийн өндрөөс буудаг Арсайн хvрхрээ юм.
Хамгийн их уст хvрхрээ: Өвөрхангай аймгийн Орхон голд орших Улаан цутгалан юм. 22 метрийн өндрөөс буудаг.
Хамгийн том мөсөн гол: Потанины мөсөн гол. Уг мөсөн голыг Оросын жуулчин Монгол судлаач нэрт эрдэмтэн Г.Н.Потанины нэрээр нэрлэсэн. Энэ мөсөн гол нь Таван Богд ууланд байдаг ба 20 км урт, 5 метр өргөнтэй. Мөн vvнээс гадна Цаст Хайрхан, Цамбагарав, Мөнх Хайрхан, Сутай, Цэнгэл Хайрхан, Хархираа, Их Бага Богд (Алтайн уулархаг нутагт), Хангайн нуруунд Отгон тэнгэр, Суврага Хайрхан, Хөвсгөл аймагт Мөнх сарьдаг, Хан тайга, Улаан тайга, Хэнтийд Асралт хайрхан, Хэнтий Хан зэрэг мөнх цаст уулс бий.
Хамгийн халуун рашаан: Шаргалжуут-Энэ нь хамгийн нөөц ундаргатай, хамгийн олон булагтай юм. Тvvний ихэнх ундрага нь 60-93 хэм халуун байдаг. Улаанбаатараас 678 км, Баянхонгор аймгаас 58 км. Уух, ваннанд орох, шавар тавих, уураар утах зэрэг эмчилгээнд хэрэглэдэг. Yе мөч, элэг цөс, архаг vрэвсэл, цусны даралт ихсэс зэрэг өвчинд тустай.
Хамгийн өндөр мод: Жодоо
Хамгийн их газар нутагтай аймаг: Өмнөгөвь -Бельги нутгаас 5 дахин том. Голландаас 4 дахин, Дани, Австри зэрэг улстай тэнцvv байна.
Хамгийн том амьтан: Хандгай-Эрийг нь манж, эмийг нь сvндэс, төлийг нь хотол. 2 настайг нь хохь, 3 настайг нь тозуул гэдэг. Хандгайн биений урт нь 200-300 см. Сэрвээний өндөр 170-230 см. Амьдын жин 300-500 кг. Манж нь олон салаа эвэртэй байдаг. Ихэвчлэн Хөвсгөл аймагт байдаг. Тухайлбал Рэнчинлхvмбэ, Улаан уул, Цагаан vvр, Чандмань-Өндөр сумын нутагт тархсан. Усанд сэлэхдээ маш сайн. Усны ургамал цуглуулан иддэг. Эвэр нь 3 сараас ургаж 7 сарын сvvлээр ясжиж гvйцдэг. Өвөл 11, 12 сард унадаг. Ясан эврийн жин нь 10-26 кг байдаг. Сvндэс 8 сар хээлээ тээж 5-6 сард ихэвчлэн ихэр, цөөнх тохиолдолд ганц хөтөл төрvvлдэг. Ороо нь 9 сард ордог.
Хамгийн хурдан шувуу: Бvргэд, Тэмээн хараацай 2 юм. Бvргэд цагт 190 км хvртэл, Тэмээн хараацай цагт 160 км хvртэл хурдалдаг.
Хамгийн ховор загас: Хилэм
Хамгийн том загас: Тул
Хамгийн том шувуу: Тас
Хамгийн өндөрт нисдэг шувуу: Ёл-7500 метрийн өндөрт нисдэг.
Хамгийн ховор шувуу: Цагаан тогоруу-Дэлхийд 250-300хан тоотой.

Katie Melua - Nine million bicycles

Sun, 25 May 2008 18:19:23 +0800

Шүлэг ба Би

Fri, 23 May 2008 13:57:42 +0800

Угтах ирээдүй жаргалтай сайхан гэрэлтэхэд

Урт амьдралд уулзсан бүхэн найз шиг санагдахад

Урам тэтгэсэн хэдхэн үгс бурам шиг амтагдахад

Уучилж чадах ухааныг захисан ижий ааваараа бахархахад

Ухаарал төрдөг өө, надад

Ганцаараа дуусах юм шиг гайхал хорвоо инээд цалгиахад

Ганганаж ниссэн шувуу бараа нь тасран алсрахад

Гал шиг сэтгэлийн минь гүнд найргийн гал дүрэлзэхэд

Ганган залуугийн араас даруухан харцаа чулуудахад

Гайхшрал төрдөг өө, надад

Санахын эгшинд гуниг хагдраасан чамайг санахад

Сайхан дурсамж, сэтгэлийнхээ уянгыг даллахад

Сартай шөнийн бүгээн аялгуу чихэнд сонсогдоход

Сархад агссан найрын хундага хөлчүүрхэхэд

Сайрхал төрдөг өө, надад

Бодолдоо ээдрэн сэтгэлээ аргадан санаа алдахад

Булиглах зүрхээ чагнаад өөрийгөө нэг тольдоход

Болор тунгалаг талст хөл доор минь чихрахад

Болжморын дуутай зун цагийг эрхгүй санагалзахад

Бодрол төрдөг өө, надад

Хур бороо сэтгэл даган урсахад

Хажууд минь сөхрөх уулс нүдэнд үзэгдэхэд

Харцанд минь тунарах эх дэлхийгээ харахад

Хайртай бүхнээ харамлаж нэгэнтээ мөрөөсөхөд

Халил төрдөг өө, надад

Намар намрын навчис гуниг дуслуулж унахад

Нас дутдаг хорвоод хоргодон холдоход

Нулимсан дуслаар дарс нэрж шимэн суугаад

Нойргүй хонон шөнийг өнгөрөөж үүр цайлгахад

Найраг төрдөг өө, надад

Шинэхэн өдрийг баяр баясгалантай угтахуйд

Шингэх нарыг амжилт бүтээлээр үдэхүйд

Шөнийн оддын доор аавыгаа эргэн дурсахуйд

Шүүдэртэй талд ээжийгээ дагаж явнаа гэж зүүдлэхүйд

Шүлэг төрдөг өө, надад